"Chutichuan, chhumpui nasa tak ang thlirtuten min hual vel avang hian, min tihnawk apiang leh sual keimah nia bet tlat chu i dah ve ang u, tin, Isua, kan rinna siamtu leh tifamkimtu lam chu enin, kan hmaa intlansiakna tur awmah chuan chhel takin i tlan zel ang u."(Hebrai 12:1)
Paula hian heta intlansiakna a tih hi, kan ringtunun zawh mek a sawina a ni ti ila kan sawi sual lo awm e.
Krista hnung kan zuina nun, ka ringtunun hi, rinawm takin, Krista thlira en tlat chungin, rinawm takin, i zawh ang u. He ringtunun kan zawhnaah hian, min tibuai thei thil tamtak a awm a ni. Hei hi kan hriat a pawimawh awm e, "chhandam ni tawh te chu, Isua Krista kan hnawl fithlathak a nih ngawt loh chuan, kan chhandamna hi a bo dawn ngai loa, chu chu sual hian a hrechiang hle a. Chuvang chuan, sual hian kan nih tur chu, kan nih theih lohna turin, min tibuai zawk thin a ni."
Entirnan, chhandam fa niin, ruihhlo vanga thlaraubo chhanchhuak tur bikin emaw, zirna tha taka zira hna sangtak chelha chu hna atang chuan Pathian hmel tilang tur bikin emaw, mi fuih (counselling) tur bikin emaw, Pastor ni turin emaw, missionary ni turin emaw, Pathianin min lo koh ta sela, Pathian min kohna zawna midang, a lama kan hruai theih lohna turin leh, kan hlawhtlina, Pathian kan chawimawi theih lohna tur hian, rawngbawltu puitling zawk kan nihna tur "kalkawngah" hian, sualin min beia, min tibuai thin a ni.
Hei vang tak hian a ni, Paula pawh hian, intlansiak angin ringtunun alo tehkhin ni. Intlansiak te chuan, a tawp (finish line) an thlir ngar ngar a, an chhehvela an mahni lo thlirtu te chu, an lo lam emaw, an lo au emaw, an lo thidang emaw, an lo nui emaw an ngaihtuah lo. An intlansiaknaah chauh chuan, an rilru an dah a, finish line chauh thlirin an tlan ngar ngar thin a ni.
Hetiang ang chiah hian, Paula chuan, ringtute chu "min tihnawk apiang leh sual keimah nia bet tlat chu i dah ve ang u" a tih. Min tibuai theitu sual hnathawhte chu, in bawhbuai tir suh u, in rawngbawlna leh Pathian koh chhan che u in intlansiaknaah chauh in rilru dah ula, intlansiak ten, finish line an thlir ngar ngar angin, "Isua, kan rinna siamtu leh tifamkimtu lam chu enin," Pathian tan chheltakin bei ngar ngar rawh u, a ti, ti ila kan sawi sual awm lo e.
Hei hi han in zawt chhin ve teh le,
Eng ber hianin nge, Pathian hmanrua tha ka nihna tur min daltu?
Tih leh,
Ka thiltih thin zingah hian, eng ber hi nge, Pathianin dinhmun thazawk min pek a tum, ka nihna tur kalkawnga, min ti khawmuangtu chu?
Kan intlansiakna bik hi chu, tumahin min tlansak theilo, tih hriain, Krista en tlat chungin i tlan tau tau ang u hmiang!
(Tawngtai Dan Tur)
Lalpa, en tur dik, nangmah ka Lalpa Isua Krista chu, en tlat zel chunga, ka nun hi ka hman a, min buatsaihsak nun tha zawk ka neih theihna tur kalkawnga, min tibuaitu sual hnathawhte hnawl zelin, i kawng pensan loa, rinawm taka ka kal zel theihnan min pui ang che, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIAIN LO FORWARD VE ZEL ANG CHE.
No comments:
Post a Comment