"Tui kianga thingphun, lui kama zungkai, Khaw lum lo thleng pawh hlau lo, A hnahte hring reng si, Khawkhen kum pawisa lo. Rah chhuah thulh chuang si lo ang hi a ni ang."(Jeremia 17:8)
Thing tana zung tha tak neih, a pawimawh zia kan hre vek awm e, tunlai nula ho leh nu ho phei chuan pangpar kan phun thin a, hei chu a par a nalh lutuk mahse zung a kaih thuk ngailo a, enkawl that loh chuan a thi thin a, tih te pawh kan nei thin a.
Kum za chuang fe tawh atanga pangpar mawi zinga an sawi tel ngei ngei thin leh valentines day apianga kan hman nasat em em leh hla thuah pawh nasa taka tarlan hlawh bawk leh engtik lai pawha hralh nasat em em ni reng thin, Rose pangpar hi kan hre vek ang. Hmeichhe hmingahte hial pawh hman a ni, nula hming chu Rosyi a nih tawh chuan, a hming kan hriat ringawt atang pawhin, ria chum leh ngaihnobei leh zaidam a nih kan ring nghal thin.
Chutiang khawpa, pangpar lar Rose pangpar hi kan han phun hian, a chhip lamah a thang hmasa ngai lo, a lang lo lam, lei chhunglamah a thang phawt thin, tichuan zung nget pangngai takin a kaih phawta, tichuan a hnah a rawn chhuaha, a hnah atang chaw a lak apiangte chu, a zung lamah a thawn thla a, tichuan a zung chuan alo hreuh thuk zel a, ni eng leh ruah atang chaw a lak theihna turin hnah tam tham tak a neih hnuah leh zung thuk taka a kaih hnuah chuan, a zung atang chuan pangpar mawi tak chu a rawn thawn choh chauh thin a.
Rose par chu a par tak tak hmain, 'zarte'(small branch) hnah panga chauh nei eng emaw zah a tichhuak leh phawt a, tichuan chung zarte hnah panga te chungah chuan a rawn kuhmuma a par chauh thin a ni. Heng zarte te hian pangpar chu an chawm thin a, mithiamte chuan pangpar kara zarte lo chhuak te phei hi chu, zarte hnuailam an paih pawhin an zuah thin, pangpar chaw petu an nih avangin.
A chang chuan chhuk zawngin kan kal thin.
Chhungkua a buai, eizawnna leh zirna a tluanglo, tawngtai a harsa bawk si, min fuih turin mi kan han pana min han fuih ve viau a, mahse kan mamawh tak sawi loin, thu min hrilh thawi tlat bawk si thin, kan thian tha ber te lahin kan nuna kan hmachhawn an hrethiam loa, chutiang chuan ti ta che min lo ti ve reng bawk nen, a ngaihna ka hrelo Lalpa tih chauhte hi tawngtai dan tur kan hriat chhunte a ni thin. Heng hunah tak hian kan zung chu a thuk zawngin Lalpan min lo kaih tir thin a ni.
A ngaihna hrelo chung chungin, Lalpa kan tih tlau tlau hnuah chuan, thu nung pakhat kan dam chhunga kan theihnghilh tawh loh tur chu, Lalpan min hriattir thin a. Kha thunung kha, kawngkhat (one step) a kan zung a than tir dan chu alo ni thin.
Tichuan, a thunung Lalpan min pek avangin, a hma aia chak zawkin rawng kan bawl thei ta a, kan thusawite kan che vel zawng zawng pawh a dam a (a Godly) ta a. Tah chiah chuan, min rem hleitheilotu, engtin pawh awm ila, min ti fek fektu, kan rawngbawl puiah leh kan chhungkuah te an rawn awm leh mai thin a, mak deuh chu heng mite hian min haw ngai hran chuanglo. Lalpa min zirtir duh vang a nih pawh a rinawm a, a chhanchu an tawngkam te hi, keimahni zawk hian kan lo ngaimawh zawk thin a. Mahse, min hua niawm takin, min kalh ngar ngar a hriat theih turin an awm fo thin a ni.
Chung hunah chuan, min kalhtua kan hriatte chu, kan tawngtainaah Lalpa A Ni Hi, Malsawm Ang Che, A Hma A Ka Tlawm Zawk Zel Theih Nan Min Pui Ang Che, kan tih theih hnuah chuan, zung pakhat chu keimahniah Lalpan alo chhuah tir fel leh der tawh tihna a ni ang.
Heng tiang hian vawi tamtak, Lalpan zung min kaihtir hnuah, chaw lak dan tur min zirtira, chaw tha chu min kawhhmuhin min pek hnuah, chauh chuan Rah Tak chu min lo chhuah tir thin a ni.
Hreawm ti em em a, a chhuk zawnga kan kal emaw kan tih lai hian, a nihna takah chuan, rahtha ber kan chhuahtheih nana, zung thuk taka, min lo kaih tirna a ni zawk thin a ni.
Hawh u, Krista lungpui nghetah hian innghatin, amahah chuan zung thuk takin i kaih ang u.
(Tawngtai Dan Tur)
Lalpa, a chhuk zawnga ka kal thin avangin ka lawm e, a chhuk zawnga ka kal hian, i nihna tak tak leh i that zia chu ka hmuh fiah phah thin a, chu chuan nangmahah thuk zawkin zung min kaih tir thin a ni. Lalpa heng hun harsaah hian sualin hmun dangah min pen tir turin min bei thin a, kei mi chaklo hi ka peng lek lek thin a ni. Harsa hle mahse, hmun danga pengbo loa, nangmah Krista lungpui nghetah chauh hian, ka inphun tlata, zung thuk zawka ka kaih zel theihna turin min pui ang che, Amen. Ti ang aw.
Instagram: https://www.instagram.com/nungturin/
Download Nungturin apps at this link
Follow tih a hnuaia inziahah khuan i click dawn nia
No comments:
Post a Comment