"Tin, Davida chuan, "Chungho chu um ila ka la umpha ang em le?" tiin LALPA a zawt a. Ani chuan a chhâng a, "Um rawh, i umpha ngei nge ang a, i chhanchhuak vek ngei ngei ang," a ti a."(I Samuela 30:8)
Davida khan Amalek ho a beih dawn khan Lalpa, ka um a ngem a ti a, Pathian chuan um rawh ( an nupui fanau an mante chu) i chhanchhuak vek ngei ngei ang," (1 Samuela 30:8) a ti a, Davidan Amalek ho chu, a hneh dawn tih chu a hre thei nghal a. Davida'in Goliatha a beih dawn pawh khan, a hneh dawna hriatna riau a nei a ni, midangin a hneh an ringlo a, a u te phei chu, a chungah an thinrim hial a nih kha, mahse Davida chuan, Lalpa puihna avangin a hneh a ring tlat a ni. Chutiang hriatna chu Davida'n a neihtheihna chhanchu Pathian a biak (worship) thin vang a ni.
Tichuan, Pathian kan bia alawm, nasa takin ka tawngtai a, tap zawih zawih pawhin Lalpa chu ka be fo alawm mahse engtin emaw hriatna riau chu ka nei lo a, a aw pawh ka hrethei chuanglo i ti em?
Pathian atang hriatna riau ila dawnglo a nih chuan, Lalpan a hriattir hun tur che i nghah a ngai a ni. I nghah lai chuan Lalpan a pek tura che chu i tawn huna i mamawh tur character (nungchang) pek phawt che a tum pawh a ni thei a. Chung mizia te chu a pek hunah che, a hun takah a hmun takah, chung hriatna chu a pe ang che.
Davida khan Goliatha a beih hma khan, nasa takin a beram venna ah te chuan, Lalpa a faka, Lalpa hnenah a tawngtai a. Tichuan, Lalpan ransa hlauhawm te a hnenhtir phawta, Lalpa puihna nen chuan, a mihring theihnaa a hnehtheih loh tur te chu a hneh thei a ni tih chu a hriattir phawt hnuah, Goliatha awmna hmunah chuan Lalpan a kal tir a, Lalpa puihnaa innghatin, khawvel hmanrua (Saula ralthuam) te hmang loin, Lalpa hmanrua nen a hnehthei a ni tih a hriaa tichuan, Lalpan Goliatha kha a hneh tir ta a nih kha.
Kan luh zel hmain hei hi han in zawt teh ang, khawvel hmanrua, kan lehkhathiamna, kan hmelthatna, fel miin min tihna, kan makeup, kan zeina (jeina) etc te hman tel phet kan la tum thin em? Davida khan Saula ralthuam kha inbel se, Goliatha kha a hneh lo ang. Chutiang bawk chuan, kan khawvel hmanrua nen a kawppui kan zawnna a kan chet chuan, kan hlawhtling kher lo ang, Lalpa neitu neih kan tum a nih chuan!
Davida hmanrua kha, virvawm a ni, virvawm hi hmatawnga inbeih nan offensive weapon-ah an hmang ngai mang lo a ni, berampu ten an beram an vennaah ramsa in an beram an rawn lak dawnin, lo inven nan an hmang thin defensive weapon a ni. Pathianin tha i in tih lerhlawrhna, hausa i in tih lerhlawrhna, thiam i in tih lerhlawrhna te kha a hmanrua ah a chhiar lo ang, i defensive weapon zawk i thuhnuai rawlhnate, i hawihhawmna te, i dawhtheihna te, i nghahtheihna te, i inngaihtlawna te kha kawppui tha i hmuhna turah chuan a hmang duh zawk ang. Virvawm kha hmanraw tlawm indonaa an hman lem loh a ni, Lalpan i hmanraw tlawm zawk kha a malsawm duh zawk ang.
Chu i hriatna mai chu ala tawklo, awmna hmun leh kan dinhmun leh kan hun tawn a kalrual (connected) a ngai a ni. Davida chung changah bawk khan han lut leh ta ila, Davida kha tein naupang engang mahse, amah chauhin Goliatha a bei ngama, a beithei bawka, beih ngei ngei a ngai bawk a ni. Hetiang ang hian, dinhmun leh hun tawn fuh bik Lalpan a siamsak ang che, mahse chung hunah chuan i hmanraw tlawm nen Lalpaa innghat chungin, i chetve a ngai thung ang, Davida pawh kha, a hmanraw tlawm nen Lalpaa innghat chungin Goliatha a bei a a hneh a ni. Lalpa rinna nen i chet ve loh chuan rinna i nei lo tihna a ni a nga, hlawhchhamsa i ni ang.
Hun tawn inrem (connection) kha han sawi leh ta ila, Ruthii leh Bohaza chungchangah pawh khan, Ruthii kha Bohaza lo a, a kal ngei ngei a ngai tlat a ni. Loah khan hawihmawna leh ngilneihna hmanrua a hmang chungin an in connect ta a ni.
Kawppui kan zawnna ah hian Lalpa rawn chungin (tawngtai chungin) leh Lalpa thu zawm chungin, fimkhur takin zawng ila, chu chu kan duh tak kan neih theihna tur chu a ni.
(Tawngtai Dan Tur)
Lalpa, kawppui atan, ruhchuktuah thlenga an mi duhtakte nei thin mite chu, nangmah dah hmasa a rawn thintu che leh i thu zawm tlat thintu te an ni tih hi ka hriat tlata, nangmah rawn hmasa zel chung leh i thu zawm zel chunga, kawppui ka zawn theih nan min pui ang che, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIAIN LO FORWARD VE ZEL ANG CHE.
No comments:
Post a Comment