Anin a ngaihsak ṭhin che u avângin, in manganna zawng zawng ama chungah nghat vek rawh u. (1 Petera 5:7)
Mihring rin ai chuan Lalpaa rinna nghah hi a ṭha zâwk a ni. Mi liante rin ai chuan Lalpaa rinna nghah hi a ṭha zâwk a ni. (Sam 118:8-9)
Mang a àn tak tak chuan min puitu tur bak mamawh kan nei chuang lo. Chaw ei tur han tlakchham meuh chuan buhfai no khat lek pawh kan kawr hak tur ai chuan kan mamawh zawk. Incheina leh silhfènte pawh hi natna khuma mu tân chuan a ṭul lem lo, dam a mamawh zawk.
Khawvela kan awm chhung hian kan mihringpuite nena in ṭanpui tawn lova Pathianin direct-a engkima min enkawla min rawn buaipui tur zawnga amah beisei tur chuan min ti lo vang. Inhmangaih tawn tura min zirtir pawh hi a ṭul hun apianga inṭanpui tawn tur kan nihzia tilangtu a ni.
Manganna Pathian chunga nghah vek:
Mihringte chuan englaipawha inngaihsak hi kan ti thei ṭhin lo. Pathian erawh chuan min ngaihsak reng a, mihringten min theihnghilh châng pawhin min hre reng a, chuvangin Petera hian in manganna zawng zawng (all your care) ama chungah nghat (cast) vek rawh u a ti a ni.
Pathianah kan manganna hi nghat hmasa ila, min puitu tur a rawn tir mai ṭhin a ni.
Pathianin engkim a tithei:
Mihringin kan tih theih loh hi Pathianin a tithei a, a ṭul a nih chuan min tichhethei zawng zawng lakah pawh min hum thei a ni.
Amaherawhchu, Pathian theihnghilh fo ṭhin kan nih avang leh, amah aia mihringa rinna nghat hmasa ṭhin kan nih avangin Amah kan hriata kan hnaih theih nan kan tuar a phal ṭhin a ni zawk.
A lam kan hawi chuan min ṭanpui ṭhin.
Lalpaa rinna nghah hi a ṭha:
Mihring te, milian leh thiltithei te chungah rinna hi nghah vek a awl ṭhin. Engkimah, Pathianah rinna nghat hmasa ila, a hmanrua mihringte chungah pawh rinna nghahna tlak min pe mai dawn zawk alo ni.
"Chungtiang kha chungtiang kha,
Hnuaitiangah chhiah la;
Hnuaitiang kha hnuaitiang kha,
Chutiangah chhiah la;
Ka ti iriak iriak e." tih hla ang hian, a hnuhnung zawk tur kan hmasaktir hian kal zelna tur a dâl ṭhin. Lalpa hmasa se, a dawtah mihring ni rawh se.
"I mangan a hnenah thlen la,
Anin a lo ṭanpui zel ang che.
(Casting all your care upon him,
For He careth, He careth for you.)"
(Tawngtai Dan Tur)
Lalpa, ka nun zawng zawngah hian nangmah ka dahhmasak zel theihna tur chein min pui la, ka nuna nangmah i hmasa chuan, ka mamawhte min pekna hmanrua tur te chu, nangin min pe mai dawn a ni, tih hi hre chunga nangmah ka dah hmasak tlat theihna tur chein min pui ang che, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIAIN LO FORWARD VE ZEL ANG CHE.
No comments:
Post a Comment