Hmangaihna A Chhanchhuah Zawk An Ngai A Ni

"Chutichuan, heng pathum, rinna te, beiseina te, hmangaihna te hi a awm reng ang; tin, hengahte hian a ropui ber chu hmangaihna hi a ni."(I Korinth 13:13) 


(A tawpa note i chhiar tel dawn nia)

Billy Grahama pawh hian fanu leh fapa buaithlak deuh a nei ve a, a fapa amah tibuai thintu chu tunah pastor a ni tawh a, an rawngbawlna engkawltu ber Franklin Grahama hi a ni a. A fanu luhlul em em, an nupa a tibuai thintu chu Ruth Graham kristian lehkhabu tha tak tak  ziaktu hi a ni.

Ruth Graham (a nu hming ang chiah an sa a) hian a pa ruang chungah ti hian a sawi a " Pasal ka then hlimin, ka insawn a ka awmna tharah chuan mi pakhat hi ka tawnga, kan inngaina nghal viau mai a, thla 2 vel lek hnuah chuan inneih kan tum nghal der a, ka nuin nei lul suh, i hman hmawh lutuk i tisual ang min ti a, kapa (Billy Graham) pawhin a rawngbawlna atang min rawn phone a, la nei suh ala hma lutuk min ti a. 

Mahse ka nei lui ta tho a, thla khat lek a liam hnuah chuan, pasala ka neih tawp loh tur ka nei a ni tih ka hre chhuak a, ka chhungte zah viau mah ila, thenlo thei ka ni si lo a, kan inthen leh ta a. Nu leh pa tizaktu tumahin nih kan duhlo ang, a bik takin Billy Grahama tizaktu nih kan duh lo zual ang. Tichuan, kan inthena, kan in puia hawn ka rilruk a, ka chhungten nasa taka min hauh ka ring a, hauh pawh ka phuin ka hria a. 

Rilru nuam lo deuh chuan kan in chu ka pan a, kapa chuan kan in thlenhma kawi khat velah chuan min lo hmuak a, motor atang ka chhuak chiah chu min lo pawm a " Wellcome Home" (thlamuang takin lo hawng rawh) a ti a, tisuh ka tih mawlh mawlh kha tih te, i luhlul em a nih kha tih te, i thiam loh a nih kha ti te chu, kapa atang hriat tur pakhat mah a awm lo. Kapa atang chuan, hmangaihna chauh hmuh tur leh hriat tur a awm a ni. 

Kapa hi mihring mai a ni a, mahse Pathian hmangaihna min hriatfiah tir a ni. Kan Pathian pawh hian, engang pawhin tisual thin mah ila, a hnena inchhira kan kir phawt chuan, hmangaih takin min lo kuangkuah thin a ni, a ti."

Keini pawhin, tha tura kan duh te, kan tawngtai sak thin a, kan chhungkaw zing amite, kan bul hnai amite kan rawngbawlpui te, kan rawngbawlpui te chhungkua ami te, kan thalai pui eng eng ah emaw a kan member pui te nen, sualin a hliam apaing te chu kan ngaihven tak tak lo anih pawhin kan tawngtai sak thin awm e.

Kan tawngtai sak thin a te chungah chuan kan bei a dawng tawh viau pawh a ni thei e. Ka dawh nasa tawh, kan enkawl nasa tawh, tawngtai pawh kan tawngtaisak nasa tawh, tawngtai sak eng ang mah ila, aman sim a duh tlat lo a, awmzia a awm chuang lo te pawh kan ti tawh maithei. Chu bakah sualna em em lang siloa, Pathian hnaih duh miah si lo ang chi, te pawh kan buaipui a ni thei bawk e.

Rinna leh beiseina hi chu sual nen a, kan indona hmanruaah hian hman nachang kan hre mai thin. Kan rin vangin Pathian hnenah nasa taka tawngtain kan thlen thin a, kan beisei avangin kan ngaihven fo thin a, nghah pawh kan nghakhlel hle thin. Mahse, a pawimawh ber hmangaihna hi kan hlamchhiah palh thin hi alo ni. Mi thenkhat chuan, kan hmangaih vanga tiang chen chen kan enkawl kan ti maithei e, kha tiang mihring hmangaihna ah chuan in hauh vak vak te a tel thin a, a loh theih loh vanga hmangaih ve hram hram kan ni tihna a ni ber ang.

Pathian hmangaihnaah chuan, engang pawhin tisual sela i ti leh ta, i va luhlul tak em tih lampang aiin, e tih leh palh te chu a awm thei a ni, mahse in bawhbeh tir suh o, Pathianin min awmpui a nga, kan tang tlang bawk a nga kan hneh em em ang tih te. Ler sim thei lo te leh neih inang kawp te pawh hi, zahawm tak leh pangngai takin enkawl an pawimawh a ni, kan chhawnchhaih a, kan deu a nih chuan an nun dan chu, an nun neih phak tawk lekah an ngai thei thin a, chu chuan a sim tir hleithei lo thin a ni.

A Lalpa Isua Krista duh angin, Billy Graham chuan, Pathian atanga chhuak hmangaihna ralthuam chu a fa sualte chungah chuan, awmlo khawpa nasa in a hmanga, chu hmangaihna chu a fate beitu sualin a ngam ta lo a ni.

I Lalpa Isua Krista duh angin, hmanraw chak ber Pathian atanga chhuak hmangaihna hi hmang turin i nei ve tawh em? Hmang ngam turin, i huaisen em le?

(Tawngtai Dan Tur)
Lalpa, i ngaihpawimawh ber chu hmangaihna a ni a, i hman raw ropui ber leh khawvel zawng zawng i hnenh theih chhan chu hmangaihna ralthuam chak ber i hman vang a ni tih hi ka hriat a, chu hmanrua nangmah atanga chhuak hmangaihna chu, kei pawhin ka chhungkuaah leh ka chhehvelah te i ram ka zauh theih nan, huaisen taka ka hman theihna turin min pui ang che, Amen. Ti ang o.

Note: I chhungten emaw, rawngbawltu i hriat ten hetiang ang hmangaihna hian an hmangaih lo che a ni thei, dem suh ang che, hetiang ang hmangaihna thiltithei hi chu Pathian atang chauh a neihtheih chi a ni a. Nang leh i chungte leh he khawvela rawngbawltu zawng zawngte hi mihring mai kan ni vek si a. Chutih rual chuan, Mihring hian Lalpa hnena a in tukluh tak zet chuan, hmangaihna tak tak chu a nei thei thin a ni.