KOHNA THIANGHLIM

Ani chuan kan thiltih angte ni lovin, ama ruat leh khawngaihna ang zâwkin min chhandam a, kohna thianghlimin min ko bawk a; chu khawngaihna chu leilung pian hmain Krista Isuaah chuan min pêk a ni tawh; (2 Timothea 1:9)

Pathianin a dân kan bawhchhiat hian a mah ngeiin  a hnen ata min hnawt chhuak a; Chhandam kan nih lehna tur pawh hi amahin a duh ang ngeia a ruat leh asiam chauh a duh a ni.

Tun hmain mizote; hmeichhe pasal nei, an lungawi loh changin an in lamah an tlân ṭhin a, a pasalin a koh leh dawn chuan palai tirin, pawisa, a man an la tlâk loh kha cheng sawmhnih vel kengin an ko ṭhin. 

Chhandam kan ni:
     Pathian laka kan bo hi Setana thuhnuaiah kan awm a, sual bawiha tâng, chhandam ngai kan ni.
   Chuta ṭanga chhandam tur chuan keini rem lo ruatpui chi a ni lo va, kan thiltih ṭhat vete hi chhuan chi a ni hek lo. Pathianin ama ruat leh a khawngaihna ang zawkin chhandamna min siam sak ta zawk a ni.

Kohna thianghlim:
    Pathianin min kohna hi thamna sum leh amahin hlawkna beisei vanga eng emaw hmanga koh kan ni lo va, a Fapa, Pathian thianghlim hmangin min ko a, a thisen thianghlim, chapona emaw, hurna emaw, eng sual natna hrik emaw pai thisen a ni lova, thisen thianghlimin min ko a ni. Chu chu khawngaihna, kohna thianghlim a ni.

Leilung pian hmaa pĕk:
Misualte tlan chhuak leh duh khawp khawngaihna chu leilung pian hma daihin Pathianin Lal lsuaah chuan min lo pe reng tawh a ni.
   
    Kan rin vang emaw, kan thawh vang emaw ni lovin khawngaihnaa chhandam kan ni a; mi tling lo te tlinna, mi fel lote felna chu LAL ISUA hi a lo ni.

       Nupui a tlân a, a ma man ngeia koh haw leh a ni ang khan, Lalpa anpuia siam, a pawl ṭhinte suala bo tawh hnu chu kan man thisen thianghlim ngei hmangin Pathianin min ko chhuak leh ta a ni.
 Lalpa chu fakin awm rawh se.

(Tawngtai Dan Tur)
Lalpa, i rawngbawltu tha tak tak te chhuan, i chhandamna an chan avang hian, zan laiah te lawmin an au a, zingkarah te lawm vangin an mittui a luang a, i chhandamna atanga i thisen zawmpui an nihna chu beidawna khur atang thawhchhuah  leh phah nan te an hmanga, mi theih ngai loh te chu an ti tih theih phah thin. Chu nun khawvelin a pek theih loh nun ropui ber chu, min pe ve turin ka ngen a che, Amen. Ti ang o.