"In zinga ropui ber chu in rawngbawltuah a awm zawk tur a ni."(Matthaia 23:11)
Mi dang tana nun hi kan Lalpa Isua Krista hian a ngai pawimawh khawp mai a, duh duh anga nun miah miah a, midang pawh duh duh anga tih kual vel emaw, duh chang midang biak chhiat emaw biak that emaw (kan mamawh te hi chu mihring hi chuan kan be tha tlangpui bawk a) ringawt hi, kan Lalpa duh dan a ni lo tih a hriat mai awm e.
Ringtu te chuan engtin nge midang tan malsawmna ka nih a nga, engtin nge midang ka puih ang, tih hi kan ngaihtuah fo tur chu a ni. Tha leh sum a midang kan puih theih loh pawhin, midang fuihtu leh hnemtu kan ni thei a, chhiatni thatni ah pawh puitu leh tawiawmtu kan ni thei bawk awm e.
Khawvela pa hausa ber Bill Gates chuan"Pawisa hi fimkhur taka kala hman chhan chu, kum 10 pawh kan company tlachhiain kan hnathawkte hlawh pek tur companyin nei lo pawh nise, ka hnuaia thawkte hlawh la pek reng ka duh vang a ni" a ti.
Car pawh pakhat ai a tam daih chu nei mahse, Bill Gates hian, mi hausa dangte angin car chi hrang hrang te a lei khawm lemlo a, rangkachak leh thilhlu te pawh a khawn khawm ngai lem lo a ni. An hnuai a thawk te, an ei bar kawngah thlamuang taka an awm theih nan nasa takin a rilru a sen thin bakah, an hnathawkte an ngui a duh lo bawk a ni, an hnathawkte an hlim loa, a hriat chuan chawlh a puanga amah ngei chuan, a hnuaia hnathawkte hmaah, fimthu thiam hlawh nei an chhawr ang maiin fiamthu thawhin tih hlim a tum thin bawk a ni. Midang tana nun a duhna hian mi fing bikah leh mi hlawhting bikah a hlangkai tih chu, a hriat mai awm e.
Jackma lar zia leh khawvelin a sumdawn dan a ngaihven thin zia kan hre theuh awm e, Jackma chuan "Maktaduaikhat kan neih chuan, kan ta angin, kan duh angin kan hmang thei ang, mahse maktaduaisawm kan neih chinah chuan, kan duh angin kan hmang tawh tur a nilo, mipuiin an sum kan enkawlna hnuaiah an dah a ni tawh zawk a, kan hman tangkai theih ringin min pe tihna a ni tawh zawk ang" a ti.
Kan Lalpa Isua pawh hian, a zirtir te kha a ngaihtuah em em a, nungchang leh tawngdan tur thlengin a zirtir a, zirtir 12 a enkawl kha chu thuhran nise, a thusawi rawn ngaithlatu mipui 5000 te pawh kha an ei tur a ngaihtuah sak a nih kha.
Isua chuan ama hlimna leh nawmna a ngai pawimawh hmasa loa, kei mahni min chhanchhuah chu a ngaihpawimawh zawk avangin, kross ah nasa taka tuarin, a nun hlan ralin min chhandam ta a nih kha.
Eng emaw midang ai a, theihna bik kan nei emaw, midang ai a hamthatna bik kan neih pawhin, midangte rawngbawlsakna atan kan hmang tur a ni.
A hnung kan zui kan Lalpa leh Ropui ber Isua Krista chu, Rawngbawltu a ni si a.
(Tawngtai Dan Tur)
Lalpa, i lawm zawng mi chu, nangma hming avanga midangte rawngbawltu te an ni tih hi ka hriat renga, i rawng ka bawl nan, nangma hnung zuia midangte rawngbawlsaktu ka nih ve theih nan min pui ang che, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIAIN LO FORWARD VE ZEL ANG CHE.
No comments:
Post a Comment